Proiektuak Nafarroako Kutxa Fundazioaren eta “la Caixa” Fundazioaren eta “la Caixa” Fundazioaren Innova Programaren lankidetza dauka
Nafarroako Garun Kaltearen Elkarteak (Adacen) eta Nafarroako Adimen Artifizialaren Ikerketa Zentroak (NAIR Center) indarrak batu dituzte NeuroPredict abian jartzeko, errehabilitazio neurologikoa gauzatzen den modua eraldatzea bilatzen duen proiektu berritzailea.
Hartutako garun-kalteak, adibidez iktus batek eragiten duenak, ehunka pertsonari eragiten die urtero Nafarroan, eta suspertze-prozesu luzeak behar dituzten sekuelak utzi ohi ditu.
NeuroPredictekin etapa berri bat irekitzen da: proiektuaren bidez, garunaren jarduera eta errehabilitazioan dauden pertsonen mugimendua erregistratu ahal izango dira, modu ez-inbaditzailean, neurketa-kasko batzuen bidez. Datu horietatik abiatuta, eta adimen artifizialari esker, errehabilitazio-programa pertsonalizatuak diseinatu ahal izango dira, esku-hartze terapeutikoak pertsonaren eboluzio neuronal eta motorraren arabera doitzeko gai izango direnak eta produktiboa ez den terapiaren zatia murrizteko aukera emango dutenak.
NeuroPredictek aukera emango lioke profesional taldeari terapiak zehatz eta ebidentzietan oinarrituta egokitzeko, eta, hartara, hondar-gaitasunak indartzeko eta pazienteen autonomia areagotzeko.
Horrek esan nahi du iktus baten edo beste gaixotasun neurologiko batzuen sekuelekin bizi direnek tratamendu eraginkorragoak, luzaroan hobeto iraungo duten aurrerapenak eta, batez ere, bizi-kalitate hobea izango dutela.
Proiektu hori adimen artifizialean berriki egin diren aurrerapenei esker da bideragarria. Izan ere, duela gutxi arte ez zigun aukerarik ematen erabiltzaileak ariketak egiten zituen bitartean in situ lortutako datuen analisi zorrotza egiteko.
Proiektuak garrantzi berezia du fase subakutuan eta kronikoan dauden pertsonentzat, zenbait tresna eskaintzen baititu lortutako aurrerapausoei eusteko, atzerapausoak saihesteko eta garunaren plastikotasuna estimulatzeko, are lesioa izan zenetik denbora luzea igaro denean ere.
Gainera, NeuroPredictek gizarte-erakundeen, ikerketa-zentroen eta osasun-arloko profesionalen arteko lankidetza sustatuko du, eta errehabilitazio neurologikoari aplikatutako erreferenteen artean finkatuko du Nafarroa.
Proiektuak Nafarroako Kutxa Fundazioaren eta “la Caixa” Fundazioaren Innova Programaren lankidetza dauka.
