Bederatzi herrialdetako doktoratu aurreko 65 ikertzaile bildu ditu eskolak bost egunez, eta, besteak beste, ikerketarako nazioarteko lankidetza indartzea du helburu.
Iruñea, 2026ko ekainaren 26a.- Aurreko astean amaitu zen International Summer School on Artificial Intelligence: From Life Sciences to Governance and Security, NAIR Centerrek, Nafarroako Unibertsitate Publikoak (NUP) eta Salernoko Unibertsitateak (Italia) batera antolatua. Bost egunez, bederatzi herrialdetako 65 doktoratu aurreko ikertzaile bildu zituen eskolak Iruñean, eta nazioarteko ospe handiko unibertsitate eta ikerketa-zentroetako adituek emandako 19 hitzaldik osatutako programa akademikoan parte hartu zuten.
Ondorengo irakasleek hartu zuten parte: Swiss Federal Statistical Officeko Yara Abu Awad eta Christine Choirat; Università degli Studi di Salernoko Francesco Bardozzo eta Roberto Tagliaferri; Universität Leipzigeko Alexander Binder; Università Magna Græcia di Catanzaroko Mario Cannataro; King Abdullah University of Science and Technologyko (KAUST) David Gómez-Cabrero eta Xabier Martínez de Morentin; Granadako Unibertsitateko Óscar Cordón; Nafarroako Unibertsitateko Mikel Hernáez; Harvard Universityko Gabriel Kreiman; University of Warwickeko Giovanni Montana; University of Luxembourgeko Igor Poltavsky; Hospital del Mar Research Instituteko (Bartzelona) Rodrigo Quian Quiroga; eta Ghent Universityko Michiel Stock.
Astean zehar, saioek erakutsi zuten adimen artifiziala hainbat arlo eraldatzen ari dela, hala nola medikuntza, bioinformatika, genomika edo kimika konputazionala. Era berean, diziplinaren erronka nagusietako bat jorratu zen: adimen artifizial fidagarria garatzea, NAIR Centerren ikerketa-arlo nagusietako bat.
Programa adimen artifizialaren oinarrietan eta eremuko metodologia berritzaileenetako batzuetan ere zentratu zen, hala nola reinforcement learning, konputazio hiperdimentsionala, biki digitalak, simulazio soziala eta datu multidimentsionalak bistaratzeko sare neuronalak.
Iruñean egindako laugarren edizio honekin, NAIR Centerrek jarraipena eman dio nazioartekotze-planari, beste herrialde batzuetako unibertsitate eta ikerketa-zentroekin lankidetza sendotzera bideratuta, etorkizuneko egonaldiak eta baterako proiektuak sustatzeko.
Inaugurazio-mintegia
International Summer School inauguratu aurretik, doktorego-mintegi bat egin zen Hirugarrena CEINen ekintzailetza-gunean. Bertan, Estatuko eta nazioarteko hainbat unibertsitatetako doktoratu aurreko 13 ikertzaile izan ziren, eta beren ikerketa-lanak publiko ez-espezializatu baten aurrean aurkeztu zituzten.
Truke akademikorako foro honek «Tesia 3 minututan» formatua izan zuen, eta hainbat gai jorratu zituen, hala nola adimen artifizialaren azalgarritasuna osasunaren arloan, ikerketa-pipelineak eta IAren aurrerapenak praktika klinikora eramatearen garrantzia.
Jardunaldiari amaiera emateko, aurkezpen onenen sariak banatu ziren, eta ondoren NAIR Centerren eta IRIS Navarra Berrikuntza Digitaleko Poloaren instalazioak bisitatu ziren.
Lehen saria Aina Maria Tur Serranok jaso zuen, Universitat de les Illes Balears unibertsitatekoa; haren atzetik sailkatu ziren Aimar Yeregui Bacaicoa eta Alfonso Indurain Ibero, biak Nafarroako Unibertsitate Publikokoak.
